08/06/2010

播放本新聞相關短片

政情:范太籲高官唔好怕落區

煲呔曾同問責團隊前日落區做政改方案宣傳爛騷造成大混亂,煲呔曾帶頭發老脾,擺明唔係有心聽市民意見,所到各區仲噓聲四起。

全國人大常委范徐麗泰尋日出席一個公開場合時,被問及前日嗰場爛騷,佢認為問責團隊應該繼續堅持同市民接觸、到社區宣傳,仲話如果問責團隊就此卻步,反對政府嘅人仲開心添!

雖然范太繼續撐住政府叫佢哋唔好腳軟,但亦話中有話,佢提醒班高官,其實市民最緊要係有機會同高官接觸。

而煲呔曾尋日下晝又喺facebook發表文章,為自己壯膽,話即使落區時面對大批不斷高呼「超錯」嘅示威者,佢仍然可以毫不畏懼咁呼籲市民放下分歧,求同存異,又話執政者要學會放下身段,仲講到自己就算競選特首,都未試過落區嗌咪。自我陶醉冇用嘅,佢真係要好好反省,講緊嘅唔係落區嘅方法,而係搞好個政府。