正如財爺鬍鬚曾咁，成日狼來了話政府財赤，到頭嚟卻係庫房滿瀉，畀人鬧爆佢係孤寒財主同「守財奴」。尋日佢去立法會財經事務委員會匯報本港最新嘅經濟狀況，有議員追問本港低收入住戶不斷增加，但啲樓價就係咁升，跟住仲好慨嘆咁話：「我覺得自己做咗幾年議員，漸漸變咗人肉錄音機，每次司長講嘅都一樣。」言下之意，即係寸鬍鬚曾講嚟講去都係三幅被，唔好話問題未解決，就連改善都毫無寸進呀！

畀議員咁寸法，鬍鬚曾應該慚愧啦，但勢估唔到佢竟然寸番人轉頭，話：「如果議員每一次問嘅問題都係一樣，我諗個答案都係一樣。」

廢噏枉為父母官

聽到咁嘅回應，嗰個議員即刻話唔能夠接受，仲話政府話要起錨，應該搵方法、用新思維去解決呢個問題。話聲一落，心水清嘅人都知道係嘲諷政府淨係識做騷啦！

唔知係咪因為落區宣傳政改方案畀人鬧爆，一提到起錨，鬍鬚曾竟然起晒弶，仲話：「如果議員繼續問同一個問題，我諗我哋嘅答案都係一樣。」

有冇離譜啲呀！改善民生係政府責任，鬍鬚曾作為政府大掌櫃，唔單止成日計錯數，又唔肯開水喉幫啲貧苦大眾，依家庫房水浸，又冇橋改善低收入住戶嘅問題，畀啲議員問多兩問，佢不但毫無悔意，只係不停咁廢噏，跟住仲惡人先告狀，仲話班議員問嚟都多餘，咁p:點做父母官呀？

雖然鬍鬚曾擺出副賴皮嘅態度，班議員當然唔放過佢啦，當啲議員問到第十四條問題時，鬍鬚曾竟然細細聲咁話：「乜仲有呀？」仲嫌煩添！貧富懸殊問題冇改善，佢咪旨意甩身，仲有排煩呀！