相對嚟講，玻璃碎片不過係小兒科，油麻地前日有一個約九呎長、近二百磅重嘅燈箱招牌由高處墮下，一名途經該處嘅少女中招受傷。事後證實，呢個招牌係僭建物，已經廢置咗六年，日久失修，支架嚴重生銹，唔出事至奇。

話時話，今次嗰位少女執番條命，可以話係不幸中嘅大幸。唔講唔知，現時香港有成二十萬個招牌，其中大約二萬個係棄置嘅，好多日久失修，搖搖欲墜，加上風季即將來臨，唔驚就假，萬一不幸中招，就算戴頭盔行騎樓底都未必頂得住！

係人都知僭建招牌違法，點解屋宇署一直唔做嘢？最誇張嘅係，今次出事嘅招牌廢置六年，成個計時炸彈咁掛喺高空，點解政府咁耐都睇唔到？屋宇署話喎，雖然有關招牌係違例建築，但係該署一直無收過投訴，所以無發出清拆令。叮，原來喺佢哋眼中，監察僭建招牌係市民嘅責任，市民唔投訴，佢哋就唔使做嘢，你話係咪好荒謬吖？

今時今日，幾荒謬嘅事都可能發生，墮招牌慘劇已經唔係第一次㗎嘞。前年六月，灣仔一間食肆嘅二百磅招牌突然墮下砸死途人，之後當局又跟進、又調查，搞咗一大輪。金融海嘯爆發後，當局仲推出「拆招牌，創就業」嘅大計，動用一千八百萬元請百幾個工人，既可拆除全港危險招牌，又可創造就業咁話，吹到天花亂墜。

咁就奇怪嘞，既然當局嘅拆招牌大計咁鬼把炮，點解仲會發生今次事件？有區議員踢爆，政府舊年拆完五千個招牌之後，今個財政年度未見延續，已經鳴金收兵。原來，所謂拆招牌大計只係當局應付輿論嘅一場大龍鳳，事過境遷，又係關人個關。

叮佢個鎯鎯，危險招牌掛通街，人命關天，政府竟然將拆招牌當做騷，簡直豈有此理。計太一叮話齋，政府唔拆危險招牌，遲早有人拆佢招牌，首先要拆嘅就係「以民為本」嗰塊爛招牌，叮！