本文重點
政壇呢碗飯唔係人人啱食，最新一例係大埔區議員李國英。佢○八年起冇再做立法會議員，闊別立會一輪，早兩日佢以大埔區議員嘅身份同舊同事聚餐，曾經有「煲呔英」之稱嘅李國英瘦咗又精神咗，睇上去仲容光煥發添。問到佢近況，佢直言立法會呢碗飯唔係幾啱佢食，壓力大、工時長，言下之意係家吓嘅生活更加好。
BMI回復正常水平
再見李國英，發覺佢變咗形象，冇再打煲呔，人都清減咗。佢話自己一直以為生活好健康，點知檢查身體先發現BMI、即係身體質量指數去到二十七，根據世界衞生組織建議，BMI高過二十五就係肥胖。當李國英知道自己已踏入肥胖界線，事不宜遲，即刻開始減肥大計，佢每朝例跑四十五分鐘，遇着得閒就返內地打高球，如果冇時間，就轉去開波場打，結果日子有功，三、四個月就減咗十五磅，BMI回復正常水平。
歸根究柢，佢話立法會呢碗飯唔啱佢食，因為做議員時由朝到晚都開會，壓力大，雖然都獲益良多，但係做番老本行律師更啱佢。