煲呔曾同佢領導嘅政府呢輪動作多多，一陣要單挑「五區公投」總發言人余若薇做公開辯論，搞到中聯辦好鬼㷫，又畀人懷疑佢喺關鍵時間畀機會對手，「無間道」傳言甚囂塵上。轉過頭，食環署同警方又選擇性執法，沒收支聯會嗰兩個民主女神像同相關浮雕，間接炒熱社會對六四二十一周年嘅關注，結果前晚維園錄得警方統計嘅十一萬幾歷史新高人次，煲呔曾嘅「無間道」疑雲真係濃到化不開！
政府兩個部門行動之後，政界中人已經話事件只會幫六四晚會拉客，結果六四燭光集會當晚，支聯會主席司徒華事後公開多謝煲呔曾政治智慧低。尋日連建制派嘅全國人大常委范徐麗泰同行政會議成員召集人梁振英（CY），都不約而同暗窒煲呔曾政府幫倒忙。
范太認為當局執法係跟足法例做，但若條法例好耐冇執行，突然用番，難免會令好多人覺得政府有意打壓。佢又話香港人向來「你愈唔畀我做，我愈要去表達一下，呢種情況喺香港好常見」，暗批當局連咁簡單嘅民情民意都拿捏唔到。CY出席另一場合時，亦唔排除市民覺得政府同警方故意阻撓，所以出嚟表達意見。