話說本港近期連續有大型瑜伽中心突然執笠，大批會員交咗錢得唔到服務，最傷嘅係嗰啲透過信用卡分期付款嘅學員，預繳嘅錢未必攞得番，分分鐘凍過水。預繳式消費風險再次惹起關注，陳家強前日喺立法會畀議員抽秤嗰陣回應話，雖然金管局明文規定銀行職員須向消費者披露風險，但市民亦有責任明白信用卡分期付款呢啲預繳式消費嘅風險喎。

叮！卸膊卸到肉酸兼核突，唔怪得佢畀人叫傻強咯。畀人呃嘅市民唔係一兩個，而係一萬三千幾個；突然執笠令消費者血本無歸嘅瑜伽中心亦唔止一間；涉及用預繳款項手法行騙嘅更唔止瑜伽呢行，電訊、美容等行業亦多次爆出類似醜聞。

有議員直指，如果銀行冇要求瑜伽中心代為向消費者解釋，即屬違反規定，銀行有責任向受影響市民賠償。呢位議員直頭谷到爆，拍枱狂炳陳家強「唔知發生乜事，好似傻吓傻吓咁」，要求佢向受事件影響嘅萬幾個市民道歉。

亦有議員話，經歷咗雷曼事件都仲有大批市民中招，證明當局根本冇吸取教訓。講得啱嘞，官員有彩自己攞，有鑊就要消費者孭，唔怪得雷曼迷債搞到本港金融市場聲譽嚴重受損，金融高官可以繼續印印腳，冇一個要問責啦。

係人都知，雷曼迷債事件引發全球金融海嘯，負責信貸風險評級嘅國際評級機構喺海嘯前對大量同次按相關嘅證券給予極高評級，正正係危機始作俑者。「股神」巴菲特日前被傳召出席美國國會聽證會前承認，評級機構一樣會犯錯，所用嘅評級模型明顯出現重大錯誤。

連大名鼎鼎嘅「股神」亦認為風險評級機構都會出錯，傻強居然當自己「永遠正確」，將預繳式消費嘅風險同責任統統推晒落消費者身上，呢招無非係想透過幫金融機構推卸責任轉移市民視線，掩蓋自己監管失職，藉機甩身啫。

叮！多年來，無論倫敦金騙案、涉及層壓式推銷同預繳式消費醜聞，定係令幾萬人血本無歸嘅雷曼迷債事件，監管不力、只識卸膊嘅港府財金官員都難辭其咎。

睇嚟，巴菲特講得都幾啱，只要退潮就知道邊個冇着底褲。風險漏洞冇人堵塞，有起事嚟關人個關，第一時間卸責，計太一叮話齋，港府班財金高官有幾多料，係堅定係流，寫晒喺八月十五啦。叮！