小白觀點：十年如一日生活苦悶

真係世道淪喪，人心不古，本來傳道授業解惑嘅老師，好似突然間全部變晒淫師，師嚴蕩然無存。家陣老師有苦自己知，有時認識一啲新朋友，都唔係幾好意思講自己做教書，費事對方聽到之後有不必要嘅聯想，面有異色咁陰陰嘴怪笑：「呵呵呵，教書呀，呵呵呵，教書好吖！」聽到咁講真係想捐落枱底！

好多人唔係好明白點解近年淫師輩出，其實呢個問題，多年前有套叫《男人四十》嘅港產片，已經好深入咁探討過。做老師嘅有啲都係大學畢業生，眼見同屆同學好多住晒中半山、四十歲已半退休唔使做咁款，而自己仲要日日揸支粉筆，十年如一日噏啲學生聽唔入耳嘅嘢，生活苦悶到嘔；再加上依家啲小朋友又零舍早熟，特別人細鬼大，定力少啲都唔得。小白老弟都好同情老師嘅處境，只好喺度推薦大家睇東野圭吾嗰本小說《放課後》，睇吓有冇多啲體會。

Email：sunsiupak@gmail.com

Blog：http://sunsiupak.blogspot.com

阿豪觀點：學內地搵警察駐學校

唔知大家有冇發覺，最近發生咗好多宗涉及老師嘅風化案，而且唔少都係涉嫌搞啲學生，真係世風日下，道德淪亡呀！

計計埋埋，近幾個月都唔知有幾多單類似事件，更離譜嘅係，日前又有一單副校長被控喺教員室非禮女教師嘅畸士。嘩，學校咁烏煙瘴氣，試問仲邊有家長放心畀仔女返學讀書呀？睇怕遲啲香港都要好似內地咁，搵荷槍實彈嘅警察進駐先搞得掂囉……

究竟有咩計可以遏止呢股歪風呢？其中一個方法，當然係盡快設立性罪犯名冊，等家長同校方可以查閱啦。之不過咁喎，如果有啲人入到學校先開始獸性大發，咁又點算好呢？

睇怕學校都要為老師設立「關愛熱線」，提供心理輔導，跟手叫所有新入職老師簽署「不非禮協議書」，順手鼓勵埋所有教職員挺身舉報身邊任何行為異常嘅同事先得嘞！

Email：lukchiho75@hotmail.com

Blog：http://lukchiho.blogspot.com

網友觀點……

老C：家長唔易做，怕仔女吸毒，又驚會遇到淫師……

大雄：怕且都要搞個校園驗腦計劃，幫老師驗吓腦至得喇！

秦先生：壓力大可能又成為老師變色魔嘅藉口。

撞板阿叔：睇吓啲大學淫賤迎新營，就知點解會出咗咁多淫師啦。