上海世博備受關注，旅遊發展局主席田北俊日前亦親自率隊北上，今次佢同十多間香港最高檔次酒店嘅總經理級高層（GM）齊赴當地，商討內地團住房優惠。十幾間大酒店GM浩蕩北上，係近年旅遊界少有嘅事，佢哋此行食、住、機票全部自費，業界咁捧場，可見田少真係有江湖地位。
旅發局喺過去嘅禮拜一晚喺上海新天地啟動「這一刻上海，下一刻香港」宣傳攻勢，田少北上主禮，唔止剪吓綵、做吓背景板咁簡單，仲有實際任務在身。前日返港嘅田少話，旅發局會喺今年盛夏舉辦多項盛事，好似「國際龍舟嘉年華」同「夏日流行音樂節」咁，如果冧掂香港嘅高檔酒店為上海團提供訂房優惠，對吸引數以千萬計嘅世博遊客順道來港玩番幾日好有幫助，於是就促成呢趟GM世紀團嘞。
據聞班GM實地考察完世博人潮後，對上海團信心大增，同旅行社高層傾折頭時都特別疏爽。而班GM有田少做領隊，遊展館時自然唔使點排隊，行程相當順暢。