本文重點
十八區區議會正副主席今日組成一個五十幾人嘅旅行團，去上海考察四日，今次旅程喺十八區區議會日前全數通過支持政改方案後舉行，時間真係夾都冇咁啱。考察團團長係行政會議成員兼屯門區議會主席劉皇發，發叔上個月八號先跟過立法會旅行團去睇世博，熟晒地頭，今次擔正旗做考察團團長，甚至做埋世博導遊都得啦！
唔夠一個月去第二次
今次旅行團主打行程係參觀世博，之後仲會兼遊蘇州，考察團嘅機票、酒店開支由政府付鈔，三餐就由團友自己搞掂，睇怕最後都係由家底夠厚嘅團友輪流做東。呢個團仲有中聯辦副主任周俊明擔任榮譽顧問，連民政事務總署署長陳甘美華都有個名譽副團長銜頭。發叔唔夠一個月又去上海世博會，可以順便向團員介紹世博場館嘅特色。
政府解釋今次考察時，話區議會係政府推動地方行政嘅重要夥伴，親身考察有助日後推動地方行政工作，但淨係招呼正副主席去推行地方行政，都講唔過去啦，難怪有人猜測，區議會通過政改方案後就有團出發，少不免有答謝班正副主席落力推銷政改方案之意。