據聞，煲呔曾早喺今個禮拜初已經靜雞雞部署一次洗樓行動，最終卻取消行程，原因未明，一拖就拖到禮拜日。官場中人否認洗樓行動有「拋錨」事故，仲誓言後日嘅新一輪政改宣傳攻勢，會安排傳媒採訪，上禮拜六嘅錯誤唔會再犯。不過，上次咁閃縮，今次忽然玩大方，都好令人懷疑啫，堂堂政府官員避傳媒好似做賊咁，真係唔夠光明磊落。

葉劉被屈做攝石人

除咗「起錨」，政圈都關注辯論單嘢，匯賢智庫主席葉劉淑儀早前去信煲呔曾，要求加入辯論，特首辦尋日回覆，話冇意圖再同其他人辯論，畀檸檬葉劉食。葉劉尋日講起即滿肚怨言，話要求加入辯論，都係想幫輕吓煲呔曾，萬一煲呔曾講錯嘢，都有佢現場幫手補飛，但煲呔曾以小人之心度君子之腹，以為佢做攝石人，認真無奈。