七月就會過檔恒隆集團做董事總經理嘅太古（中國）主席陳南祿（Philip），已經開始離任前休假，佢係馬會大董，入吓馬場，月尾又打算陪太太同囡囡去上海睇世博，真係好逍遙。前晚雖然落大雨，但Philip照樣同太太入馬場為愛駒「時時有機」打氣，結果佢嘅愛駒留前鬥後，最後一百米發力衝過終點，為Philip贏得二十七萬元獎金。
Philip近排跳槽又獲獎，笑容真係燦爛到可以賣廣告，仲好興奮咁拉埋正喺馬會食飯嘅國泰企業事務董事莊偉茵落場拉頭馬。Philip話，好開心愛駒跑出，佢知道愛駒每次出賽都搏到盡。「時時有機」自○八年三月首次出賽爆大冷贏出後，近兩年成績一直浮浮沉沉，直至前晚至收復失地，難怪佢嘅主人咁開心啦。