長毛早前先用「九品芝麻官」形容李剛，尋日點解公然打劫林公公份人工？唔通真係咁好心幫李剛？睇嚟唔多似，事關長毛尋日話，中聯辦呢輪又見政黨又見普選聯，香港政府嘅官員就好似被架空咁，中聯辦咁忙，林公公就好似冇嘢做，應該將人工分啲出嚟，言語中充滿揶揄嘅味道。不過，長毛都將李剛嘅稱謂改為「一品芝麻官」，唔再用佢之前講嘅「九品芝麻官」，唔通李剛上次高調窒過佢後，長毛都驚咗人哋再問佢係幾多品議員？

講番林公公尋日喺立法會舌戰議員，啲議員郁吓就話佢冇嘢做，過去亦幾次透過動議、修訂預算案想減佢人工。林公公對呢啲質詢已經熟能生巧，尋日一於遊花園避問題。

提出重入雷曼小組

長毛重回立法會後，準備一一重拾以前嘅工作，日前就正式提出做番雷曼迷債小組委員會成員，呢個小組係獲內會決議授權使用特權法嘅小組，若有成員要加入，需要內會成員重新審議，所以今日嘅內會就會討論呢個申請。秘書處尋日提醒議員，考慮係咪畀長毛加入時，應該注意兩點，一係有關成員必須聽證，二係新委員如果獲批加入，小組應該做補救措施，協助新委員掌握之前未有聽取嘅證供等。

我哋都問過一啲內會嘅建制派，有人認為雷曼小組雖擁有使用特權法嘅權限，但運作同調查委員會唔同，覺得即使長毛加入都冇乜問題，似乎長毛食閉門羹嘅機會唔大，但畀人數番舊事就難免喇。