睇嚟要先將食環署署長卓永興請出嚟叮一叮。事關食環署有法不依，搞到冷凍海產市場七國咁亂。法例規定，所有預先包裝嘅食品，包括冷凍食品在內，都要標明食用日期。之但係，好多間店舖出售嘅冰鮮蝦、冷凍帶子、響螺同象拔蚌等都冇標明日期，有啲包裝袋連標籤都冇。

包裝上面嘅來源地更係亂晒龍。問店主：「呢啲冰鮮蝦邊度出產o架？」佢就話：「係印尼嘅。」「印尼邊度呀？」「咪就係印尼囉！」又或者問：「呢啲冷凍蜆係邊度出o架？」「日本嘅。」「日本邊度呀？」「你問咁多嘢嘅！」有啲包裝仲離譜，冰凍帶子明明係內地嘅大連出產，但標籤就寫係日本貨。簡直係呃神騙鬼。

大佬呀，咁搞法可大可小o架。包裝上面冇標明來源地，又冇食用日期，市民一個唔覺意食咗有毒或者過期海產，唔死都一身潺。有辦睇o架，日前有唔少市民食咗毒帶子，四肢麻痹，條脷硬晒，又屙又嘔，好彩搶救及時，唔係條命仔就凍過水。

最搞笑嘅係，食環署轄下嘅食物安全中心話喎，貝類嘅毒素主要喺內臟積聚，叫市民食時丟咗內臟，但係又話「唔保證唔會中毒」，咁即係點呀？正如有傳染病專科醫生話齋，將海產內臟移除，最多將毒素減少，唔可以清除，一樣有機會中毒。一旦發現海產受污染，唔食為妙。問題係，冷凍海產嘅標籤唔清唔楚，點知邊啲食得邊啲唔食得呀？

話時話，今時今日毒海產來歷不明，都多得食環署班官員。有業界人士踢爆，食環署對入口商抽查好馬虎，任對方申報產品來源地，根本冇核查。嘩，咁都得！

叮！其實都唔使大驚小怪，食環署不嬲後知後覺，平時楔高枕頭大覺瞓，出咗事先至做門面工夫。當局不設防，有毒食品長驅直入，外地有乜香港就有乜，試問，孔雀石綠魚、山埃蘇眉、蘇丹紅鹹蛋、哮喘藥豬肉、三聚氰胺毒奶等等，邊樣冇喺香港出現過呀？仲次次都係傳媒踢爆，港府先如夢初醒。

嗱，今次毒帶子襲港，咁多人領嘢，政府先至臨急抱佛腳，話要制訂食品安全法規管喎。但如果當局有法不依，法例咪又係形同虛設？叮佢個鎯鎯，唔通真係要毒死幾個人，當局至肯做嘢？