邱騰華尋日出席停車熄匙嘅法案委員會會議，眼見七十幾個與會團體，三分二都要求撤銷草案，佢即出新招，自爆二十六年前喺中環停車時，亦試過唔熄匙涼冷氣，結果畀路邊小販當頭棒喝：「你涼冷氣就享受，我就難受！」佢當時頓覺自己自私，以後亦主動停車熄匙，藉此呼籲業界應考慮從別人角度出發，同意立法。

之不過，呢招擺自己上枱嘅自爆式硬銷冇乜用，街工嘅立法會議員梁耀忠首先唔收貨，反批評佢嘅言論等同暗示業界自私，根本係偏見，仲話：「唔係業界自私，而係當局從來冇解決過車廂會唔會因為太熱等技術問題。」連議員都咁講，業界反應當然更激，繼續開口炮轟。玩完自爆，唔知邱局長下次仲有乜新招呢？