相信大家仲記得立法會財務委員會喺年初審理高鐵六百六十九億撥款嘅馬拉松會議，喺泛民主派議員不停重複發問同拋出大量動議嘅「拉布戰術」下，最終財委會開咗逾二十四小時會先通過到議案，呢次事件仲揭發財委會嘅議事程序有「缺陷」。
依家立法會每個委員會都有唔同嘅議事規則，如果立法會大會上有好多動議有待表決，議員可以提出將表決響鐘時間由三分鐘縮短到一分鐘，財委會轄下嘅人事編制小組同工務小組都有類似條文，但偏偏財委會就冇，所以之前嘅高鐵撥款，淨係審議二十八項動議都用咗個半鐘，財委會要加多一節先可以表決撥款。
既然有問題，當然要解決，財委會前幾日就發出文件，諮詢委員對修改《財務委員會會議程序》嘅意見，希望加強彈性，包括畀議員提出冇經預告嘅動議，以及將點名表決嘅響鐘時間由依家兩分鐘縮短到一分鐘，等議員就算想藉提出議案嚟拉布，都拉唔到咁長。
有委員認為，冇理由個個委員會都有條文防拉布，獨獨得財委會冇，搞到大家淨係聽響鐘都聽到發呆，倒不如一次過修例，杜絕泛民任何攝位機會，相信好容易得到過半委員支持通過。睇嚟下次泛民要再拉布，要諗吓新招數喇！