唔知係認真打壓定係政府低能，警隊二十一年嚟首次沒收民主女神像，搞到群情洶湧。警隊見唔能夠再拖，尋日同支聯會傾掂數，交還民主女神像。警隊由頭到尾唔認衰，堅持係依法辦事，但係就派出警花—警察公共關係科署理總警司曾豔霜解畫，唔知係咪想緩和氣氛呢？
雖然Madam曾台型不俗，講說話都算清晰流利，但料就欠奉，一味重申警隊立場，仲好專業咁形容兩個女神像為「銅色人像」同「白色人像」。有記者問佢，點解以前民主女神像擺喺時代廣場唔告，依家又拉又鎖？支聯會拒絕簽署聲明，警方有乜回應？Madam曾一於「一句到尾」，話所有執法都係合法同合理。
其實Madam曾今次都係捱義氣，事關警察公共關係科一哥吳家聲放緊大假。Madam曾以前曾經破過新三狼案，之後又被派駐國際刑警組織法國里昂總部，成為亞洲首位女性代表，所以見慣大場面。聽聞佢喺法國嗰時，仲有唔少裙下之臣添。