點解只係得三名行政會議非官守議員粉墨登場拍政改宣傳廣告？其他非官守議員去晒邊呢？冇喺廣告出現嘅行會召集人CY梁振英同成員Marvin張建東尋日喺中環食完晏後，就對拍廣告一事各有解說。
照計CY同Marvin呢兩位高頭大馬嘅山東人出鏡拍政改宣傳廣告應該冇難度至係㗎，但點解唔拍呢？Marvin笑笑口話：「因為我唔夠靚仔嘛！」相信佢都係講笑啫，實情係輯廣告拍攝期間，佢以滙控獨立非執董身份去咗英國開董事會，返港後睇電視先知政府拍咗輯政改廣告。
如果再有出鏡機會又點呢？Marvin婉轉咁拒絕話：「我唔擅長出鏡，都係搵口齒伶俐嘅人拍會最好。」至於CY就一於冇有怕，話只係政府一直冇搵過佢拍政改廣告，如果搵到佢，佢一定應承咁話，依家只好隨時候命喎！