眾所周知，煲呔曾小氣兼記仇，見網民將「起錨」惡搞成「超錯」，佢竟然死雞撐飯蓋，尋日喺facebook話「超錯」嘅係當年否決政改嘅議員，對一切批評，似乎都掩耳閉目唔理。

佢嘅「真兄弟」、財爺鬍鬚曾早前參加起錨爛騷時，畀市民對望兩分鐘口啞啞，咁啱得咁蹺，佢尋日落中學硬銷政改，點知錯完又錯，簡直瘀爆。

鬍鬚曾以學校旅行形容政改，指每個同學想去嘅目的地都唔同，但唔可以因為有分歧而取消旅行。呢個比喻即刻畀教經濟科嘅翁志明老師寸爆，翁Sir高舉「超錯」標語厲聲反擊，話睇唔到政改嘅目的地，又指政府冇辦法令市民安心接受中途方案，「如果決定去南非睇世界盃，但隻船起錨後途經索馬里會畀人騎劫，我寧願喺香港睇電視！」

之後有學生話既然要精益求益，點解要好似唐唐咁講，要捨A取B呢？鬍鬚曾好似完全冇諗過會有咁尖銳嘅問題，惟有話自己讀書時「有啲都好開心」。呢個落差咁大，啲學生不約而同還以不屑眼神。

事先審查學生問題

最離譜嘅係佢連政改方案嘅基本資料都唔背書呀！有同學問佢會點爭取足夠立法會議員支持，佢話政府會力爭每一票，但政改要有三分之二、即係四十一票先可以通過，所以好困難。爭取四十票已夠難，依家鬍鬚曾無情情要多一票，仲話唔係「超錯」！

我哋尋日仲收到投訴，話鬍鬚曾要求學校早一日交學生嘅問題畀佢睇，有事先審查之嫌，令部分知道問題已經曝光嘅學生非常不滿，決定臨場轉問題。財政司司長辦公室回應時承認有了解過學生會問乜問題，但就唔認係干預，指過吓目好正常。

睇完「孖曾」嘅舉動，相信大家都認同「起錨」唔係「超錯」，應該係「超超錯」，班問責團隊愈做愈錯，睇怕好快就畀啲網民噏中要「收皮」。