小白觀點:搵食環署執法最掂檔

世界盃即將開鑼，警方高調出嚟話會加強打擊非法賭波，度咗個口號「唔賭外圍波，樂趣一樣多」，唔知點解，我總覺得下聯應該係「賭咗外圍波，賺到笑呵呵」。不過呢個弱雞政府做乜都係講吓就算，搞控煙咁耐，夜晚去唱K落酒吧，咪一樣煙霧瀰漫！依家仲話要巡查播3D賽事嘅戲院捉賭仔添，好心啦，「校園驗毒」計劃成效有幾多，大家心照啦，唔通又要搞個「戲院驗賭」，好似話叫佢哋就地小便，睇吓有冇賭仔基因？又或者剪撮頭髮，睇吓有冇曾經賭過咩！

其實反賭外圍波，唔使出動O記咁大陣仗吖，依家食環署咁英明神武，佢哋嘅「城管大哥」出晒名夠惡，而且法律知識仲勁過黃仁龍，隨時可以挖到一條開埠以嚟都未用過嘅例，再唔係咪插贓話佢哋藏有走私豬肉囉。

Blog:http://sunsiupak.blogspot.com

阿豪觀點:警方能力有限得把聲

世界盃就快開鑼，警方尋日高調召開記者會，強調會加強打擊網上非法賭波。大家諗吓嗰陣時一單淫照事件，已經暴露出警方網上執法嘅能力，大家對警方呢輪打擊網上非法賭波，又有冇信心呢？

講多無謂，數字係唔會呃人嘅，警方透露，對上一屆世界盃拉到參與非法賭博嘅人士，數目係舊年全年嘅五倍喎……嘩，聽落好似好神勇咁噃，實際即係拉咗幾多人呢？原來都係三百四十幾人咁大把，當中有幾多係涉及網上賭波，就真係唔知嘞。仲有喎，如果啲人係去外國網站賭，班差大哥可以點樣追查呢？始終人哋唔會將啲波纜當係娛樂項目咁公開展覽，唔係咁易畀你掃蕩㗎喎……

不過點講都好啦，豪伯喺度要奉勸球迷一句，小賭可怡情，大賭會亂性㗎！

Blog:http://lukchiho.blogspot.com

網友觀點

變態賭徒：嘥氣啦！成日都話打擊網上非法賭波，但又唔見拉到人。

波仔：馬會畀人搶咗咁多生意，警方點都要講吓嘢嘅。

賭神：班賭仔個個輸到要去戒賭機構求助，咁就係最得嘅打擊方法！

賭勤：拉人亂拋垃圾算啦，無謂浪費警力。