前日凌晨，一架由旺角去荃灣嘅紅色小巴喺西九龍走廊忽然失控，先後撞向兩邊嘅石壆，之後全車翻側，向前滑行咗五十米先至停低，車頭撞爛晒，一個前轆飛咗出嚟。乘客就慘嘞，車內人壓人，搞到一身傷。

因乜事咁大鑊呀？聽吓事主點講。有個乘客話喎，出事時車速好快，跟住車廂忽然向上拋，轟隆一聲撞落石壆，好彩佢夠醒目，揸住車窗鐵枝，先至冇拋出去。

唔使問阿桂，又係衰超速啦。亡命小巴即係亡命小巴，呢條線好多司機揸車都唔要命，為咗揸多一轉搵多啲錢，罔顧乘客安全開快車，時速經常超過一百公里。

其實，一到深夜，幾乎所有小巴都超速行駛。本報記者曾經踢爆，有小巴由旺角去落馬洲，本來預計要四十五分鐘，但係行咗二十五分鐘就到埗，時速高達一百二十九公里，問你服未？

叮！咁樣飛車，乘客命仔實係凍過水啦。講出嚟嚇你一驚，全港每年平均有一千五百人因小巴車禍傷亡。嗱，舊年上水公路嗰單小巴車禍，就造成三死十四傷，現場血肉橫飛，睇見都心噏。

話時話，亡命小巴違法超速，政府點解唔理嘅？唔通真係無王管？實際上，政府不嬲都係唔死人唔做嘢。運輸署一早就話，會要求小巴安裝車速限制器，但始終得個噏字。近排出咗幾單大車禍，各界狂炳，署方至話由六月七日開始實施。講係咁講，但又冇時間表，唔知何年何月先至全部小巴安裝得晒。

仲有，法例規定小巴如果裝有安全帶，乘客唔扣就會被檢控，但係檢控數字低到無倫。執法人員懶懶閒，法例形同虛設。

更弊嘅係，全港仲有二千幾架小巴未裝安全帶，法例只管新登記嘅小巴，舊車就要分批更換，每次出咗事，運輸署都話會加快更換進度，可惜講完就算。按現時嘅進度，全部更換要十年，期間唔知又死幾多人嘞。

咪以為太一叮嚇你，呢，上月沙田發生的士撞小巴事故，就係因為小巴冇裝安全帶，有乘客好似人肉飛彈咁飛出車外，當場冇命，唔驚係假嘅！

亡命小巴害咗咁多人，難為班政府高官仲當無事發生過咁，梗係啦，佢哋唔會坐小巴吖嘛。不如咁啦，官老爺第日唔使帶親友去海洋公園嘞，就帶佢哋坐亡命小巴啦，保證個個都話刺激過坐過山車。不過，千祈記住幫佢哋買保險，否則出咗事連湯藥費都蝕埋。