小白觀點：海關吹水疑點多

海關敲鑼打鼓公布破獲網站販賣盜版影碟奇案，破案過程迂迴曲折，佢哋話要先派出兩名臥底用「潮語」聯絡賣家，等對方以為係90後，冇戒心至肯親身交收，最後一舉人贓並獲。聽講搜到9000GB硬盤，內藏幾千套戲，總值十七萬蚊。

海關嘅版本講到懶係智勇雙全咁，不過，神探小白篤篤額頭，喺黑板上畫大堆數字，就覺得當中好多疑點。

首先，依家啲後生仔唔係BT就係上ppstream，要乜有乜，仲邊有電車男買老翻吖。至於第二個疑點仲離譜，唔該去腦場睇吓，500GB嘅硬盤，幾舊水都唔使，加加埋埋連埋燒碟機呀、電腦呀，幾萬蚊已經好專業，雖然政府成日買貴嘢唔係好知價，但都唔好作到咁誇吖，喂，橫掂係報大數，不如話總值十七億吖笨。

講到呢度，我覺得自己已經破獲咗香港史上最戇居嘅老翻神探伽利略就真。

Email：sunsiupak@gmail.com

Blog：http://sunsiupak.blogspot.com

阿豪觀點：扮低能入型入格

大家唔好以為「潮語」淨係可以扮in，同埋可以應付公開考試，原來仲可以撲滅罪行。海關最近搗破一個販賣盜版光碟嘅網站，就係靠派出臥底同目標人物扮熟，方法係經常講「潮語」。照咁睇，依家香港地嘅教學語言應該加多一樣「潮語」，湊夠兩文四語至得嘞。

不過今次潮語破老翻事件，始終唔夠上次真人版《逃學威龍》裏面嗰個師姐咁勁。人哋要出真樣混入學校個喎，要扮後生咁多年，而又唔畀人識穿，真係有一定難度囉……相反，喺網上虛擬世界，唔好話扮後生啦，就算扮係一條魚都未必冇人信啦。

況且今次海關成功唔係因為潮語講得叻，而係畀人以為係無知少女同埋電車男而疏於防範。真係唔知嗰幾個臥底應該高興自己神勇破案吖，定抑或為咗自己扮低能扮到入型入格、以假亂真而唔開心呢？

Email：lukchiho75@hotmail.com

Blog：http://lukchiho.blogspot.com

網友觀點……

小山：個盜版漢頭腦認真簡單，幾句潮語就搞掂咗佢。

老趙：根本係個犯蠢，就算臥底講潮州話佢都會上當㗎啦！

三叔：學潮語可能係做臥底嘅必修課程喎。

甘仔：原來識潮語可消除猜忌，特首好應學吓可有助同後生溝通！