本港四大商會嘅龍頭—香港總商會尋日選舉新一屆領導層，好多商界重量級代表陸續入場，包括長實副主席兼董事總經理「小超人」李澤鉅。
雖然曾一度有暗湧話有「倒胡」行動，阻身兼常務副主席嘅醫管局主席胡定旭坐正，但肥胡尋日入場時一派輕鬆。問佢緊唔緊張？佢搖頭話一啲都唔會，心情睇嚟好好。
原本理事會預定用半小時開會選出新一屆主席、副主席，點知最後唔使一分鐘就完成投票。點解咁快？因為反對勢力缺席囉！
上一屆曾嘗試支持兩名自己友進身理事會失敗嘅富貴黨前主席田北俊，今年冇推出代表競逐之餘，佢連理事會都唔嚟，索性棄權。所以肥胡當選後被問到所得票數時，都忍唔住開懷大笑，現場得票率係百分之百添！
肥胡仲滿腹大計，話今年總商會踏入一百五十周年，佢首先會反思過去一百五十年做咗啲乜嘢，又諗緊將來要多啲為商界、會員同埋香港服務喎！