日前煲呔曾為政改搞「起錨」爛騷，總動員全體司局長落區派單張做騷不特止，連副局、政助都唔放過。尋日路經中環，撞見財經事務及庫務局副局長梁鳳儀，同埋勞工及福利局政治助理莫宜端變身「阿四」派「起錨」單張，旁邊仲有另一位男士，組成「單張三人組」出擊。
黃昏六點，中環人行色匆匆，歸心似箭，話知你有米派都未必攞。梁鳳儀唔理咁多，同一身白領麗人Look嘅莫宜端企喺太子大廈對出嘅港鐵站，見人就派單張或襟章，但肯接單張嘅人只係一半一半，「三人組」派咗半粒鐘就停手。
莫宜端話，今次係自己第一次喺中環派宣傳政改單張，選擇喺呢區打游擊，主要因為喺呢區出入嘅人士，大部分知識水平較高，所以希望佢哋多啲了解政改諮詢方案。都係打游擊好啲，否則畀維園阿哥收到風去踩場咪仲大鑊。