究竟有幾多人可以夢想成真？總之唔係每個人都可以，所以如果有機會當然要好好把握啦，身為全國人大代表、香港國際電影節協會主席Wilfred王英偉囝囝嘅王梓軒今日出新唱碟，為理想又再向前邁進一步。
尋日喺中環遇到Wilfred同朋友食晏，對於梓軒今日出新碟，佢都好有信心銷量唔錯，Wilfred仲係梓軒唱片公司嘅老闆，即係出面出錢撐囝囝啦！不過佢絕對唔係開間公司畀囝囝發明星夢，舊年梓軒喺頒獎禮度勇奪多個新人獎，又擁有美國康奈爾大學心理同現代舞雙學士學位，殺入樂壇絕對唔係玩玩吓。
不過，家吓唱片巿道艱難，做唱片要投資唔少，但Wilfred間公司只得一個唱作人，咁有冇得賺㗎？佢話好在囝囝作曲填詞全部自己搞掂晒，慳番唔少製作費，佢仲話今日嘅記者會度會公布一個好消息宣布合作計劃，所以身為老闆嘅Wilfred對於梓軒呢個「伙記」都好有信心，唔怕會蝕錢。
雖然撐個仔撐到咁盡，但佢笑言唔會買囝囝嘅唱片，要囝囝自己識做簽名送畀佢喎！咁梗係要有少少回報嘅。