華懋集團已故前主席龔如心持股百分之八十四點三七嘅Chime Corporation Limited，喺舊年二月申報持有一億股香港資源控股有限公司嘅優先股，而香港資源旗下全資附屬公司金至尊珠寶喺香港嘅四家全新形象店正式登場，其中，荃灣如心廣場分店尋日舉行剪綵揭幕儀式，華懋慈善基金主席龔仁心亦有現身撐場。被問到會唔會用華懋慈善基金增持香港資源股權時，龔仁心即刻好客氣咁話，「如果黃生畀機會嘅話，一定會」，但要睇適當時間和機會。
香港資源兼金至尊主席黃英豪尋日亦都好識做，佢大讚華懋係好股東，又多謝龔仁心親身出席揭幕儀式支持，又多謝華懋畀呢個咁好位置嘅舖位畀佢哋，仲笑言如果日後華懋旗下商場有好位置，而又可以有優惠少少嘅價錢嘅話，會再考慮。
另外，金至尊珠寶將會冠名贊助《葉問前傳》兼委任該電影男女主角杜宇航同陳嘉桓為旗下品牌代言人。香港資源執行董事徐傳順尋日亦有出席活動，佢話同《葉問前傳》出品人冼國林好熟，依家都傾緊幾部戲加插金至尊嘅元素，例如喺戲中加插專門店嘅鏡頭片段，或者喺愛情片段中引入旗下品牌嘅珠寶，以收宣傳之效。