立法會尋日開政改小組會，多名議員向政制及內地事務局局長「林公公」林瑞麟逼供，要求交出表決政改方案時間表。林公公只重申七月中立會暑假休會前提交方案表決，具體日子未定。佢呢句話半真半假啦，事關自從「623」消息曝光，政府的確一直研究改日子嘅可行性，絞盡腦汁，聽聞至今仍未死心。
政府睇中「623」，目的為避開「七一」呢個敏感日子，因為若喺「七一」後嘅兩個星期三，向立會提交方案表決，變相協助泛民谷高「七一」遊行人數。如果政府棄用「623」，又有乜日子可揀呢？後一個星期三即六月三十日，正值「七一」前夕，風頭火勢，政府評估表決政改隨時玩兩至三日，即橫跨「七一」，自然博唔過。提早一個星期三又點呀？可能個天都唔鍾意煲呔曾，六月十六日撞正端午節紅日假期，立法會休息。咁不如再早一個星期三、即六月九日呢，可惜，時間太倉卒，已經無法符合必須提早十二個工作天向立法會秘書處作「預告」嘅規定嘞。
據聞，特區政府雖未最後拍板，但似乎已冇得揀，「623」政改方案生死戰勢所難免。