同日喺立法會資訊科技及廣播事務委員會特別會議上，更加成為泛民炮轟「起錨」騷嘅戰場。李永達批評港台由朝早六點到深夜十二點，頻密播放「起錨」口號廣告，簡直係對聽眾鋪天蓋地疲勞轟炸，質疑港台呢個社會公器，已為政府私用，硬銷政改，編輯自主已死。另一名泛民議員亦質疑，煲呔曾喺過去嘅周末同周日，一連兩日透過中英文版嘅《香港家書》同《給香港的信》硬銷政改，港台已成為政府喉舌，而唔係公共廣播電台。

林公公死撐奏效

在座嘅港台台長兼廣播處長黃華麒一臉無奈咁話對政府嘅新政策，所有傳媒都有興趣，港台亦唔例外，至於播放頻密程度，就視乎編輯決定。麒叔無端端被人圍攻，怪只能怪上錯煲呔曾隻「拋錨」死火賊船啦。

全國人大常委范徐麗泰尋日亦被問及對起錨行動嘅睇法，佢直言唔覺得煲呔曾咁大場騷會有乜嘢效果，覺得今次對政府嚟講係一個好好嘅經驗，即係彈煲呔曾「拋錨」騷唔掂。

劣評如潮，畀人鬧爆，但林公公喺傳媒面前仍然自我感覺良好，仲話「到目前為止，新一輪嘅推廣活動有一定程度奏效」。又引用「柴九哥」名句「人生有幾多個十年」，呼籲泛民咪否決方案，蹉跎歲月。點奏效法？佢又答唔出，仲預告問責高官會有第二波宣傳攻勢添！

林公公淨係好似王婆賣瓜，自賣自誇，仲預告埋賊船再起錨，依家政改形勢風高浪急，煲呔曾政府再係做埋啲咁嘅爛騷落去，真係遲早反艇。