冇錯，流浮山鮮魚批發市場的而且確有平價雞賣，外面賣百幾蚊一隻，呢度五十幾蚊就有交易。不過太一叮勸你千祈唔好買，事關呢啲都係走私雞，未經過任何檢疫，食咗隨時中招。

咁就奇嘞，鮮魚批發市場點解會有走私雞賣嘅？唔講真係唔知，原來呢度兩年前已經係走私雞嘅天堂。走私客將啲劏好嘅雞用發泡膠盒裝好，收埋喺啲魚蝦蟹下面，用運海鮮嘅船偷偷運入香港，喺海鮮批發市場售賣。好多酒樓、茶餐廳都大手入貨。

走私雞活動咁猖獗，當局居然矇查查。更離譜嘅係，有業界人士多次向海關、警方、食環署等部門舉報，仲拎埋啲雞去畀佢哋睇，雖然人證物證俱全，當局硬係唔理，真係畀佢吹脹！

政府懶懶閒，玩殘正規雞檔。自從走私雞入侵之後，元朗一帶嘅雞檔生意額少咗一半，原本幫襯佢哋嘅食肆都去走私客嗰度攞貨，搞到正規雞販冇啖好食。

玩殘雞販已經唔啱，玩死市民更加大件事。正如有傳染病專科醫生話齋，走私雞未經過檢疫，質素冇保證，如果雞隻染有禽流感，病毒就會傳播，處理雞隻嘅人會好危險。其實，受影響嘅又點止咁少呀，如果禽流感大爆發，所有香港人都難逃一劫。

話時話，今時今日走私雞橫行，都係多得特區政府施政混亂。回歸以來，香港幾乎年年受禽流感威脅。政府平時唔燒香，臨急抱佛腳，疫情殺到就將全港雞隻殺光，然後就關人個關，所以疫情每隔幾年就爆發一次。

食衞局局長周一嶽等高官認為，所有事都因活雞而起，活雞愈少就愈唔會出問題，所以就搏命限制活雞進口，以前每日入口九萬幾隻，依家就得番一萬幾隻。活雞多本來唔係問題，最緊要係做好檢疫，做足防疫措施。政府十幾年前就話要建立中央屠宰場，仲實牙實齒話今年會落實計劃，但係周一嶽日前忽然轉軚，話中央屠宰未必有利可圖，要再搵顧問研究可行性咁話。睇嚟個計劃隨時會爛尾。政府一時一樣，活雞價格梗係高企啦，走私雞咪乘虛而入囉。

一句講到尾，政府無力堵截走私雞，又唔肯增加活雞供應量，令雞價上漲，走私客有利可圖，大量未經檢疫嘅走私雞進入香港。再咁搞法，禽流感分分鐘會捲土重來，市民又要有得震冇得瞓嘞。叮！