立法會仲有兩個月先抖暑，但身為潮州「架己冷」嘅議員「橄欖」陳鑑林同「金勞詹」詹培忠已發起喺七月底去潮汕旅遊三日，結果反應熱烈，迅即有十四個議員報名，而且拖男帶女，除咗橄欖、李慧琼、李鳳英同陳健波一家幾口參加外，陳茂波、黃定光、王國興、劉皇發、潘佩璆、黃容根、謝偉俊、張學明同梁劉柔芬都帶埋另一半一齊去，夾埋超過三十人同行。
按初步行程安排，首日會先喺潮陽食個午飯，然後轉去汕頭，晚飯後會前往潮州，並入住東山湖溫泉渡假村。第二日會遊覽潮安同潮州嘅名勝古蹟，午飯後再去澄海同揭東縣。第三日會分別前往普寧同惠陽遊覽，當然行程期間會同當地官員會面啦！同樣係「架己冷」嘅陳健波好期待今次旅程，佢話好懷念潮州幾層厚嘅蠔餅，又讚潮州牛丸特香，總之會盡情享受今次潮州美食之旅。