政府早前發起所謂嘅「新社區運動」，話要派三司十二局嘅問責官員落區宣傳政改。首席推銷員唐唐首站為保安全，特登揀咗去間著名官校庇理羅士女子中學演講，諗住名校學生應該冇咁反叛，易應付啲，點知都係出師不利，畀非常老師舉牌點名嚟鬧。尋日輪到政制及內地事務局副局長黃靜文去推銷，點知都係揀名校—拔萃男書院。
起初政府話落區係要接觸群眾，聽取市民意見，但事實上根本唔係嗰回事。唔知佢哋係咪對自己個爛方案不表信心，擔心如果自己去一啲Band3嘅學校，所有學生會全部化身社民連三子，對佢哋群起攻之，所以喺揀學校時都諗過度過。咁又係嘅，到時畀人喝倒采兼掟蕉，又上報章頭條就唔好啦。
之不過，唔好以為揀名校就冇事喎。男拔嘅學生出名敢言，單係睇佢哋早前對校董張宇人毫不留情就略知一二啦。男拔學生尋日嘅問題亦相當刁鑽兼唔易答，好彩黃副局冇好似佢老細咁做人肉錄音機，成功過關。