加入咗政府三十三年嘅規劃署署長伍謝淑瑩已屆五十八歲之齡，下個月底正式退休，但接佢棒嘅現任規劃署副署長梁焯輝，無論年紀同資歷原來都只係同伍太相差一年，現年五十七歲。

若以伍太為例，梁焯輝可能「再坐一會」，一、兩年內又會退休，若果佢有大把假期，可能坐得仲短時間添！真慘情，由五十七歲頂五十八歲，連搵個後生少少嘅都冇。

林鄭向麥齊光招手

發展局常任秘書長（工務）麥齊光亦喺下個月退休，雖然佢係工程師出身嘅專業職系官員，但原來佢好有政治智慧，仲記得早前房屋、規劃及地政局常秘（房屋）梁展文退休後做新工，多名負責審批嘅政務官背景高官都認為梁嘅新工冇存在利益衝突，唯獨麥齊光認為梁退休後加入地產公司會引起公眾負面感覺，仲「提醒」公務員事務局要避嫌添！

麥齊光喺兩年前四川大地震後，協助推動四川重建項目，發展局局長林鄭月娥仲拍佢膊頭，邀請佢退休後擔任非全職顧問，做發展局支援四川重建小組嘅組長。林鄭認真順手呀。