蒲頭靜極思動？

董Sir聽見「轉會」兩個字就笑騎騎咁話：「唔係！嚟聽吓都好，（論壇）對成個商界都有益。」佢話唔擔心畀人誤會佢想轉會，因為經濟動力冇向佢招手，又話自己仲係富貴黨人喎。董Sir一直得富貴黨前主席田少力撐，出任立法會旅遊界代表，可惜年前選舉以九票之差輸咗畀「法律超人」謝偉俊，惟有專心做旅議會總幹事。近排佢連其他政黨搞嘅活動都參加，莫非係靜極思動？

講番個論壇，由立法會議員林健鋒做主持，佢自爆花咗唔少心思製作會場布景板，起用綠黃兩色做主色。何解呢？原來係因為欣賞世界盃勁旅巴西隊，佢哋擅長三角短傳，就好似經濟動力咁，為中小企融資問題周旋喺政府同銀行之間喎！佢係咪諗多咗呀？