喺兩鐵合併後，「百年老店」九廣鐵路公司名存實亡，搖身一變成為收租公司。最近九鐵出年報，顯示九鐵總裁「尖不甩」詹伯樂舊年年薪達二百六十幾萬元，比起○八年多咗五十萬元，仲以為尖不甩加薪兩成幾，睇真啲原來包埋約滿酬金。只係管理一間空殼公司就有咁高嘅人工袋袋平安，相信可列入全球筍工榜。
○七年十二月初兩鐵合併後，九鐵名下資產以租賃形式，交由港鐵營運，而尖不甩自此獲財經事務及庫務局局長陳家強領導嘅九鐵管理局委任為九鐵總裁，任期兩年，負責九鐵日常管理工作嘅閒職，聽九鐵職員講尖不甩經已獲續任。
睇番○九年年報，尖不甩上年年薪共有二百六十幾萬元，當中已經包含一項約滿酬金。尖不甩只係收吓租，每年就有過二百萬年薪，真係羨慕死唔少每日為口奔馳嘅打工仔。不過，若果尖不甩同○七年有近五百萬年薪相比，咁就真係差好遠喇！