邏輯矛盾逆中央意

話說建制派飯局尋晚七點開始，共有三十名議員出席，首四十分鐘大家先「摸摸底」，再同煲呔曾共進晚宴。煲呔曾坐落冇耐，匯賢智庫葉劉淑儀上前遞交請願信，批評政府既然唔承認「五區公投」，點解邀約余若薇辯論？又指辯論唔應該兩陣對決，應多方面參與，成為群英會。

跟住富貴黨主席劉健儀、工聯會葉偉明等十幾個建制派議員紛紛起哄發難，唔客氣咁當面質疑煲呔曾嘅做法有問題。第一個發炮嗰個係王國興，佢話煲呔曾自打嘴巴，一時力斥「公投」違憲，一時又以五區公投運動總發言人身份邀請余若薇辯論，邏輯矛盾，佢反建議煲呔曾一係嚟立法會同五十九位議員辯論，一係就叫民主派自己協商代表，唔好搞欽點。

詹培忠都喺會外炮轟，指煲呔曾想單挑邊個，有佢嘅自由，但中央政府清楚講明唔承認「五區公投」，煲呔曾竟然以五區公投運動總發言人身份邀請余若薇辯論，係咪想公然挑戰中央先？煲呔曾必須向中央交代，向市民交代！

面對建制派嬲到爆炸，煲呔曾喺會上回應，話知道自己單挑余若薇係螳臂當車，個人榮辱冇所謂，但希望感動港人，係一片苦心，明知今次政改過到嘅機會好微，所以至出到呢招喎。嗱！點火啦，呢次燒着自己，煲呔曾都唔知點收科！

受煲呔曾「寵幸」嘅公文袋，尋日就得寸進尺，要求煲呔曾將辯論提早到六月六號進行，畀市民盡早了解政改方案嘅正反論據，仲巴閉到搵埋主持人添。煲呔曾腹背受敵，騎虎難下，難怪有部分建制派議員話等睇戲囉！