小白觀點:卡片機遊戲多意識不良
為咗慶祝「食鬼」遊戲面世三十年,Google特登整咗個logo,並且可以即刻玩埋呢個好有集體回憶嘅遊戲。原來好多後生仔對呢隻遊戲聞所未聞,有人仲以為網站被黑客入侵搞到要投訴添。
講開「食鬼」,令小白老弟諗起任天堂嘅經典Game & Watch卡片機,冇jailbreak冇老翻,一機一game,手中有一部,仲威過家陣拎住部iPhone。但係若以依家嘅定義,其實卡片機好多game都係屬於意識不良,絕對唔啱十八歲以下嘅細路玩—「高空擲物」唔使講固然係教壞人,講到最差最差就係「消防員」,遊戲要你接住不斷喺大廈跳落嚟嘅人,愈跳愈多,多到接唔晒,就會撻到肝腦塗地。你知啦,小朋友跳樓成風,上上吓周會都忍唔住要跳,道德佬仲唔入晒卡片機數咩!講咁多老餅回憶,「80後」同「90後」如果睇到一頭霧水嘅話,千祈唔好寫信嚟投訴喎。
Email:sunsiupak@gmail.com
Blog:http://sunsiupak.blogspot.com
阿豪觀點:格鬥讓round鼓吹河蟹
唔經唔覺,經典電玩「食鬼」啱啱過咗三十歲生日,Google為咗慶祝,將個logo化身為「食鬼」遊戲,仲畀用家即時玩添,點知竟然接到投訴。豪伯開頭以為梗係啲人投訴話掛住玩嘥晒啲時間啦,原來多數都係話唔知個logo變到花呢碌代表乜嘢,仲以為自己部腦中毒。乜三十年前嘅遊戲真係out晒㗎嗱?
豪伯開始入機舖打機嘅時候,「食鬼」呢個遊戲話晒唔係打打殺殺,始終比較益智,話畀阿媽聽打「食鬼」,點都有較大機會過骨嘛……
大家千祈唔好以為淨係得「食鬼」先至益智,其實好多對打嘅格鬥game都有教育意義,事關喺雙打過程裏面,有一個「讓round」嘅不成文規定,根據三盤兩勝嘅賽制,贏咗第一round嘅人,要喺第二round讓對手。呢嗱,你話如果年輕人個個都咁禮讓,呢個社會你話幾和諧呢!
Email:lukchiho75@hotmail.com
Blog:http://lukchiho.blogspot.com
網友觀點……
老趙:當時喺機舖沉迷玩「食鬼」嘅後生仔,好多依家都變咗阿叔喇。
谷弟:谷歌下次搞懷舊唔該講清楚,嚇親啲後生唔好嘛!
見過鬼:最驚谷歌版「食鬼」好似街景拍攝車咁,會意外侵犯到私隱!
沐浴巨星:豪伯,勿再懷念紅白機年代。