23/05/2010

播放本新聞相關短片

工業區變堆填區 香港遲早變臭港

反對割地!反對蠶食郊野公園!反對侵佔工業用地!究竟發生乜嘢事,居民咁勞氣?事情係咁嘅,環保署唔理居民反對,不斷擴展將軍澳垃圾堆填區,舊年侵佔清水灣郊野公園五公頃土地,家陣仲話要佔用將軍澳工業區一幅十五公頃工業用地,咁搞法,容乜易成個將軍澳變成堆填區?唔反對就假!唔勞氣就假!

係人都知,清水灣郊野公園景色怡人,係市民假日郊遊嘅好去處,無啦啦割一忽做垃圾堆填區,大煞風景不特止,堆填區擴大後,成個環境及空氣都大受影響啦。有區議員狂批當局大石壓死蟹,必要時會提出司法覆核。

呢種事唔係第一次發生,亦唔會係最後一次。香港地少人多,處理垃圾本來已經係一個大問題,加上呢個政府弱勢兼弱智,問題更加難解決。

嗱,全港每日產生嘅垃圾都好似山咁高,唯一出路係送去幾個垃圾堆填區傾倒。問題係,堆填區有限,垃圾無限,唔使幾耐,所有堆填區都會塞爆,就算環保署點樣霸王硬上弓,四圍佔用土地,甚至將禮賓府都用嚟作堆填區,都解決唔到問題㗎。

話時話,當局都唔係冇度過橋嘅,而且仲有好多宏圖大計添,可惜都係有姿勢冇實際。例如環境局高官一早就話要學日本設計現代化焚化爐,既可以減少垃圾,又可以發電,的確幾有諗頭,點知講咗N咁多年,所謂焚化爐,連影都未有。

唉,弱勢政府百事哀,班官員吹水唔抹嘴,講多過做,又點可能成事吖。垃圾焚化爐呢家嘢,唔多唔少都會對環境造成影響,所以無論去邊度興建,都會有人反對。問題係,如果官員一聽到反對聲音就做縮頭烏龜,咁就乜都唔使做啦。一句講晒,焚化爐遲早都要興建,遲建不如早建,如果當局連呢件事都做唔到,咁就不如早抖。

講開又講,處理垃圾有好多辦法,焚化爐只係其中之一,最有效同最環保嘅辦法仲係由源頭做起,推動廢物回收。人哋日本早喺九十年代初已經立法規定喺包裝紙印上垃圾分類標籤,方便市民分類回收,經過多年努力,廢物回收嘅觀念已經喺日本深入人心,大大減少垃圾排放。睇番香港,政府除咗裝模作樣擺咗幾隻唔同顏色嘅垃圾箱,呼籲市民自行分類外,就關人個關,從來冇積極推動。蚊髀同牛髀,處理廢物回收,香港同日本根本冇得比。

總而言之,要解決都市垃圾,一定要多管齊下,唔可以獨沽一味,淨係靠霸地擴建堆填區,香港遲早陸沉。叮!