為咗爭取市民對政改方案嘅支持，煲呔曾政府話要破格、創新嘅行動，但次次觸礁；過年煲呔曾夥同麥兜拍《回家真好》短片畀網友鬧爆，早前玩「十五司局長愛落區」軟硬兼施推政改，唐唐又畀老師當面寸爆，就連煲呔曾搞電視辯論都得罪晒建制同泛民政黨，真係做乜死乜。
平時淨係識做「人肉錄音機」嘅政制及內地事務局局長「林公公」林瑞麟尋日出席政改方案公聽會時，都好似受咗「感化」，用新比喻論政改方案，話呢個方案就算唔係泛民所喜歡嘅「全餐」，起碼都係個有番幾味大家鍾意菜式嘅「常餐」，暗指大家有飯就好食住先，唔好挑剔咁多。
心水清嘅朋友都知道，「常餐與快餐」嘅故事係麥兜故事中嘅表表者，講麥兜同麥太去食飯，問伙記常餐有啲乜？伙記就不斷話常餐等於快餐、午餐、晚餐、特餐云云，猛咁帶你遊花園，等你遊到天荒地老就唔記得自己本身想食乜。
林公公用「常餐」嚟形容政改，係暗示政改方案點改都一樣，只係出口術點到大家陀陀擰，定係純粹巧合又或另有玄機呢？