相信大家仲記得，因為維園阿哥愈玩愈激，「城市論譠」變咗「城市亂壇」，建制派講明玩杯葛，反而金融界出身嘅全國政協委員劉夢熊早前就獨闖龍潭，連論壇主持人都讚佢夠勇。其實佢不嬲都有「文壇俠士」之稱，不平則鳴，近日遇上政改爭拗不斷，佢周不時自掏腰包，喺報章大字標題痛陳利害。
早前行經中環置地對出一條行人路，撞見劉夢熊喺行人路上左睇右睇，記者好奇尾隨其後，睇真啲，原來係搵報紙檔。嗰陣雖然係黃昏六點，劉夢熊仍然好緊張咁刨報紙，仲即買即睇，樂在其中。記者上前打招呼，佢笑騎騎話，知道《東方日報》刊出佢嘅消息，梗要捧吓場啦！原來佢都係《東方日報》嘅忠實粉絲嚟。
問起近期忙啲乜？佢話正搞緊收購美國天然氣計劃，周身唔得閒，但幾忙都好，開餐絕唔求其，仲會搵埋公司高層食吓好嘢，係充電最佳方法。