白鴿黨議員甘乃威就涉嫌求愛不遂怒炒女助理件事，前幾日向相關嘅調查委員會作供，委員會預計喺七月立法會休會前可以完成調查，再着手寫報告。加上依家女方態度曖昧，分分鐘唔會出面指證甘威，相信最後甘威甩身機率好高。甘威早前就話已決定九月份帶埋一家大細去上海參觀世博，唔知係咪順便慶祝埋佢成功翻身呢？
甘威話以前都有去參觀世博，得出一個心得，就係唔好做首批參觀者，同埋一定要預多幾日先睇得晒所有展館。佢話之前喺名古屋睇世博，預得兩日時間，等入場又大排長龍，搞到乜都睇唔到，所以佢決定唔跟立法會世博團走馬看花。
但佢反而預晒時間，趁九月休會同屋企人去上海行一轉，既然九月立法會休會得閒啲，到時上海天氣又好啲，相信都係適當嘅時候；加上上海世博係大盛事，佢相信一開幕肯定會吸引好多人蜂擁而至，所以覺得遲啲先去，到時人少啲，各個展館又會運行得順暢啲，咁佢哋去參觀就實順順利利咁話！