消息指出，呢個安排係中央經過深思熟慮嘅結果，目的要凸顯中央重視白鴿黨嗰九票。普選聯內有十四張泛民票，但係民協、職工盟、街工、社福界張國柱同衞生服務界李國麟等其實都係散票，拉票成本高而風險大，最重要係中央認為向民主派「打荷包」攞三、四票令政改方案勉強過骨，無助平息政改爭拗，要過就要高票通過。所以今次「破冰」會面，中央刻意畀白鴿黨一個「VIP」身份，就係打「誠意牌」嘅其中一着。

咁白鴿黨又點睇中央嘅心意？主席鐵頭仁尋日強調以溝通爭取最大民主空間，係白鴿黨一個重要政策，唔會隨便改變。

呢邊廂李剛見白鴿黨，那邊廂特首辦主任譚志源證實，煲呔曾聽晚會首次出席建制派嘅定期飯局，交流政改。譚指煲呔曾喺一個幾月前收到建制派邀請，好快回覆應約，強調煲呔曾同建制派一向緊密聯絡，如果能透過聽日會面就政改作深入交流，亦係好事。

但我哋聽到又係另一版本，話建制派喺上星期四先改喺上海總會食飯，仲臨時通知煲呔曾會出席，可見佢近日先答允應約。煲呔曾近來對搞對抗嘅泛民呵護有加，對建制派盟友則眼尾都唔望，據聞一眾建制派議員頂住條氣，所以佢聽日赴會，「安撫」味道相當濃烈。