新界鄉村好多傳統習俗，每逢大節日或喜慶事都會聚首食盆菜，但原來有啲鄉公所有個習俗，就係每逢農曆初二同十六會做禡食番餐。曾經同新界鄉議局副主席張學明推介過大埔美食嘅大埔區議員陳灶良，上星期就帶記者去參觀大埔七約鄉公所嘅做禡盛會，通常餸菜有客家炆豬肉、白烚肥鴨、粉葛鯪魚煲豬橫脷老火湯等，鄉土風味十足。
身兼林村旅遊發展召集人嘅良哥話，鄉公所每次做禡要預備二十幾人餸菜，全靠船灣李屋村村長李鳳有一手包辦。有哥入廚幾十年，好後生已經喺圍村學煮盆菜，最拿手係客家炆豬肉，佢話一次做禡要用上二十三斤豬腩上肉，加上豬手、豆腐卜、粉腸、竹筍、鹹蝦等材料，用鑊以慢火炆一個多小時，最後加上蠔油、麻油、豉油王、老抽調味，色香味俱全。
有哥仲話，喺圍村內炆豬肉一般會用柴火，火力較平均，反而用石油氣爐難度較高，經常要留意火力，否則咁大煲豬肉好易煲燶。可惜鄉公所做禡唔會對外開放，大家想食客家炆豬肉，就要等圍村喜慶節日嘞！