白富鴻話接掌菁英會後會全力搞好年底舉行嘅第二屆香港博鰲青年論壇，仲計劃每個月搞一次研討會，讓大學年輕一代多啲交流。施榮忻就話菁英會未來將會發展得更具規模及更高效，又話會請來中港兩地商界猛人，分享從商經驗及對青年發展嘅睇法，好似阿里巴巴集團創辦人馬雲、前體操王子李寧、前恒生銀行大班柯清輝等都會喺佢哋邀請之列。

卸任在即嘅施榮忻話，最自豪係成功同博鰲論壇合作喺香港舉辦首屆青年論壇，期望第二屆論壇同樣搞得有聲有色。佢喺七月起會接替恒基地產副主席李家傑，擔任百仁基金主席。