Ronald係「80後」，有「80後」嘅抗爭方式，早排抗議港鐵已玩過活埋，畀居民倒泥頭埋住自己，其後薄扶林街坊搞遊行抗議，佢仲以SM（性虐待）方式抗議，自綁兼用毛巾塞住把口，寓意居民畀大公司壓迫，唔知點反抗連聲都冇得出。

死撐自比奧巴馬希拉妮

但喺政府公布佢獲聘入特首辦嘅消息後，同日掀起網上熱論，有網民直指佢轉工好着數，但就唔明點解佢都知肯定要辭職唔做區議員，搞咁多被活埋、綑綁自己，做到咁激咁反政府，依家就去加入政府，真係好講唔通囉。呢個網民仲話：「佢之前咁激咁反政府，我唔覺得佢係為咗南區選民囉，而係佢為咗追尋刺激就真囉！」

嗰個網民仲質疑：「反反吓政府，依家加入政府，你話班居民會點諗啦？之前以為陳先生靠得住，點知依家離佢哋而去……，仲做埋特首辦特別助理，陳先生，有咁發達得咁發達啦！」

睇完呢啲網上留言，可見先係質疑佢以前咁激嘅行動係另有目的，繼而係批評佢背棄選民，以前做嘅嘢只係戴假面具。

佢解畫話辭議席加入政府，喺外國好習以為常，例如奧巴馬同希拉妮都辭咗議席同搞補選啦！跟住又話佢以前用啲激進嘅方法反映居民嘅意見，尤其政府又唔係佢仇人，雙方又唔係勢不兩立，佢入到特首辦都係會反映居民嘅意見。

似乎講得好有道理，但佢又點可以自比奧巴馬同希拉妮呢？人哋貴為美國總統同國務卿，佢只係入特首辦做影印咋！

再講，佢辭去區議會席位後，唔會獲發結束辦事處津貼，而佢用公帑買番嚟嘅用具要全數交還。咁即係話，佢要自掏腰包畀職員嘅遣散費，咁都唔會好多啫，以佢依家份工每月七萬蚊人工嚟講，可謂濕濕碎；比起過往得一萬八千蚊議員津貼，好似嗰個網民話齋，佢「轉工好着數」！