23/05/2010

播放本新聞相關短片

任意網為:逼 Miss 著裙

小白觀點:穿窿襪露腳毛仲嚇人

到底女教師應唔應該着裙返學呢?我認為呢個係一個哲學問題,並唔係平機會可以解決到嘅,因為裙呢樣嘢,本質上已經蘊含咗一定歧視性,已經超越學校,係成個人類社會問題,男人老狗着固然被人歧視係易服癖嘅「偽娘文化」,即使女人着,唔好意思,好多都冇顧及其他人嘅感受。

我記得當年讀大學,有位女導師好鍾意着裙,佢講講吓書會忽然翹起腳坐咗喺枱上,唔睇猶自可,一睇,嘩,真係有啲胃酸湧出。見佢對腳嘅絲襪有幾個窿不特止,最得人驚嘅係,佢好似一直以來都專心睇學術期刊,甚少揭吓《姊妹》呢啲女性教科書,竟然連着絲襪ABC都唔曉,啲腳毛破絲襪而出有之,望風披靡壓咗喺絲襪下亦有之,唔係講笑,為免學生嘅心靈受到不必要嘅創傷,小白老弟曾有個衝動向校務處投訴,禁制呢位Miss再咁着裙。

Email:sunsiupak@gmail.com

Blog:http://sunsiupak.blogspot.com

阿豪觀點:趕絕偽娘阿Sir係咪歧視?

有教師去平機會投訴,話校方規定女教師要着裙唔公平。有啲老師尋日打上電台,話學校冇電梯,着裙上落好唔方便,但係校方一定要佢着,你哋又點睇呢?

有啲好奇,如果有學校規定唔畀男教師着裙,係咪又公平番呢?計我話,咁樣做都可能係順得哥情失嫂意。依家內地咪好興所謂「偽娘」嘅,有部分參加《快樂男聲》之後仲紅遍全國,連日韓等地都有粉絲添。咁大家話嘞,如果學校裏面原來都有幾個「偽娘」男教師,而佢哋又要求着裙返學,咁又點算呢?

呢件事真係審死官,趁今次一次過澄清晒佢都未嘗唔係一件好事,但係有一樣嘢可以肯定,原來個女教師兩年前已經向平機會投訴,但係當時嘅主席鄧爾邦就闊佬懶理,卒之拖到依家至處理,咁你哋話鄧爾邦係咪食塞米呀?

Email:lukchiho75@hotmail.com

Blog:http://lukchiho.blogspot.com

網友觀點……

番薯:全校女教師都接受着裙,問題好似喺嗰位女教師度喎。

老趙:女教師唔願着裙都啱嘅,偷拍裙底風氣咁盛!

周仔:如果女生又話唔鍾意着裙,咁平機會咪好唔得閒!

吳好凡:規定教師一律着制服上堂,咁咪唔使拗囉!