唔講真係唔知，原來香港有十五萬精神病人咁多，其中四萬仲係嚴重個案，現時只有一成左右住院治療，其餘九成分散喺社區。周一嶽等人講得鬼死咁好聽，話咁做可以幫助精神病康復者融入社區，但當局講一套做一套，唔肯增撥資源跟進，卒之唔單止康復者融唔入社區，反而產生更多問題。

講真，當局根本冇心跟進，佢哋將包袱卸畀社區，就關人個關。係人都知，公立醫院精神科醫護人手嚴重不足，康復者覆診等鬼死咁耐。因為病人多，醫生診一個症只有十分鐘時間。醫務社工更係少得可憐，每個社工要照顧七十八個個案，咁搞法，點跟進吖。叮！

近排連續爆咗多單悲劇，政府至死死氣推出一個「個案管理計劃」，可惜受惠者只有五千人咁大把，有病人組織直斥「杯水車薪」。

更弊嘅係，政府部門各自為政，正如有病人團體話齋，如果警方、社署、醫管局溝通吓，再搵人去跟進，就可以減低發生事故嘅機會。可惜各部門互不溝通，各管各。例如，醫管局畀精神病患者出院，又唔向社署通報，話保護私隱喎。往往出咗事，社署先至知道。

仲有噃，當局鼓勵病人家屬參與、鄰里互相照顧，但又推出怪雞政策幫倒忙。例如，如果精神病人與家人同住，就會因入息超出上限唔可以申領綜援。所以好多病人都被迫獨居，大佬呀，咁點互相照顧呀！叮！

「東方報業民意調查」顯示，有四成二受訪市民直指當局對精神病康復者跟進不足，未能防患於未然。三成話會令康復者自生自滅。有業界人士直言，當局為慳錢將病人離棄於社區，非常可恥，本來融入社區有助康復，但當局閂水喉，卒之適得其反，反映成個體制有問題。

叮！呢啲只係公共醫療亂象嘅冰山一角咋。呢，醫管局推出藥物名冊，將大批貴藥列為自費，令基層市民被迫減藥，甚至放棄求醫。上述民調顯示，四成五受訪者認為政府政策失敗，貧窮病人如同等死。有二成七人直指政府向錢看，一成五人認為官僚涼薄無情。

一句講到尾，多數受訪者不滿政府對精神病康復者嘅政策，近期出現嘅事件反映當局政策失敗，醫療制度千瘡百孔。政府高官如果仲係視民意如浮雲，縮骨到底，類似悲劇勢必陸續有來。