本文重點
沙田馬場尋日有盛事，咁啱撞到全國人大常委范徐麗泰，問起有冇去投票，佢話佢幾個月前已經話咗唔投㗎啦！原來佢啱啱喺加勒比海遊完船河返嚟，七日行程只係買咗對沙灘鞋畀自己，另外買咗變色T恤、變色手袋分別送畀囝囝同新抱。雖然戰利品唔多，但勝在旅程盡情享受世界級嘅陽光同沙灘，好似做咗Spa咁。
盛惠八百蚊美金
范太話今次旅程係喺網上搵到嘅，每位只需八百蚊美金，好抵！於是佢叫埋姑仔范尚霞、囡囡凌華同女婿一齊把臂同遊。首站係巴哈馬半月灣（Half Moon Cay），喺呢個冇人住嘅熱帶雨林小島，遊客可一試喺海灘騎馬漫步。范太盛讚嗰度海水清澈透明，最令人嘆為觀止嘅係海水層次分明，由深至淺竟然有三種唔同嘅顏色。不過佢好懶，只係浸吓水，但見無數色彩繽紛嘅魚仔喺身邊游嚟游去，都覺得好寫意。
跟住佢哋去咗被譽為全球十大最靚沙灘之一嘅St. Thomas，但范太對嗰度嘅評價麻麻，因為沙灘有落葉，明顯疏於打理，令人失望喎。下一站去咗波多黎各首都San Juan，大家行吓舊城，竟然發現咗間中國餐館，范太仲喺餐館前留影添。玩埋最後一站避世小島Grand Turk，佢哋就帶住愉快嘅心情返港。