社會福利署前署長「阿魚」余志穩舊年喺一片掌聲之中結束官場生涯，好多人戥佢升唔正首長級第六級好唔抵，佢亦承認感到失望。雖然佢一直冇乜怨言，亦過咗咁耐嘞，但似乎佢心裏面仍然有條刺，間唔中仲係拮吓拮吓。
尋日佢喺電台節目《舊日的足跡》中，就流露咗啲「反政府」意識。事關煲呔曾同班問責高官講明唔會喺尋日嘅立法會補選投票，但阿魚就話要盡公民責任去投番一票，仲加多句話咁多年未試過唔投添！咁即係擺明同煲呔曾對着幹啫！
依家無官一身輕，佢話喺短短八個月內同老婆去咗四次旅行，但暫時仲係退休前休假，到八月至正式退休。雖然佢表明唔會論政，但對房屋政策好有意見，佢話政府有責任為市民提供安居之所，所以等三個月後，就會以普通市民身份畀意見咁話！
阿魚即係預告八月有料爆啦！仲有就係依家樓價高企，好多市民上唔到車，政府堅拒復建居屋畀市民鬧爆，六月又話推行九招十二式，睇嚟阿魚嘅箭頭仔對準運輸及房屋局局長Eva鄭汝樺，蓄勢待發準備射爆佢。