建制派杯葛城市論壇，難得全國政協委員劉夢熊願意獨闖龍潭，主持謝志峰都讚佢夠勇，又幫口叫「維園阿哥」任亮憲，君子動口不動手……指，發言時唔好手指指咁挑釁。但呼籲歸呼籲，台下紅衫軍嘅叫囂聲愈嚟愈大，全場針對劉夢熊，劉夢熊則罵不還口，相當忍得。

現場所見，紅衫軍人數比往日多，連企位都逼爆，港台要拉閘限入場人數，官方報數指現場觀眾破紀錄有四百五十人。論壇結束，維園阿哥主動同劉夢熊握手講拜拜，但劉離開時照樣遭紅衫軍尾隨挑釁。

劉夢熊一路面不改容，睇真啲，佢身邊除咗有警員，仲有幾名男子好似保鏢咁傍住前後左右，睇嚟似係佢嘅朋友或職員組成保安團隊傍住佢「出紅海」。原來有備而嚟，唔怪得咁淡定啦！