喺尋日嘅立法會補選投票日，成班高官見到傳媒避得就避，但七個執法部門嘅首長就避無可避，一早要出席執法人員火炬慈善跑，面對「今日投唔投票」呢個問題，大家都有備而來。
長跑活動朝早十一點舉行，入境處處長白韞六係九龍西選民，呢區係全港競爭最激烈嘅選區，但佢話冇分析過選舉形勢，兼且仲有十二個鐘，所以未決定投唔投票，連成日流流長會做乜都未決定喎。既然未有嘢做，佢點解只係主禮而唔落場跑呢？佢就話長跑唔係佢強項，但點都講唔出自己有乜強項。講到咁，即係叫班記者無謂再問落去啫。
消防處署理處長陳楚鑫都係耍官腔，佢話公務員應該政治中立，投票係個人權利亦係個人選擇，佢唔講自己會唔會投票亦係佢嘅選擇喎。全場答得最肯定嘅就係政治任命嘅保安局局長李少光，佢一聽到投票就即刻回答話：「特首講咗啦！」連覆述立場都慳番，慳水慳力！