所以尋日嘅補選結果，將左右中央對政改大戰嘅下階段部署走向。隨住補選結束，據聞中央港澳工作協調小組將喺一個禮拜內檢討結果，啟動新一輪政改工作。

隨時出手拉攏

有消息話，中央仍然希望通過政改方案，今日之後，中央、特區政府以至建制派撐政改嘅造勢行動將一浪接一浪，好似上禮拜嘅香港工商界政改論壇，出席代表涵蓋總商會、中總、廠商會、工總、地產建設商會、僱主聯會、出入口商會同富貴黨，中聯辦副主任李剛喺席上呼籲大家要齊齊出力支持政改，令香港民主有所進步，其實就係一次誓師大會，呼籲大家5．16後出嚟撐政改。

不過，政界最關注嘅，莫過於中央同特區政府點樣拉普選聯嗰十四張票。普選聯喺政改路上同公社兩黨分道揚鑣，走上「溝通」之路，自從四月十四號特區政府推出寸步不讓嘅政改方案後，普選聯同中央嘅溝通之門就好似「嘭」一聲咁突然關上，沉寂無聲。

接近中方消息人士話，其實大家完全捉錯用神，中央同普選聯道門根本從未打開過，亦冇上鎖。呢句話真係可圈可點，以直線思維解釋，即係表示中央從未同普選聯作實質溝通，但亦未絕到落閘放狗謝絕見客，只係停留喺膠着狀態，但換個角度卻睇到另一局面，就係顯示中央留有一手，等五區補選結束後，有可能真正開門見客，拉攏普選聯，殺泛民「鷹派」一個措手不及。至於出嚟見客嘅係京官定駐港中聯辦官員？一切就要視乎事態發展嘞。